Tolosaldeko Hitza

Dirua eta tabakoa eraman dute. Atea ere bortxatzen saiatu dira, baina duela urtebete egindako lapurretaren ondorioz, bertan lan egiten dutenek atea aldatu zuten eta hobea jarri zuten.

Leiho bateko burnizko barrote zahar eta sendo bat moztu dute eta horrela lortu dute ostatura sartzea. Behin barrotea moztuta egurrezko leiho bat ireki behar izan dute, "indar handirik egin behar izan gabe", bertako langileak esan bezala.
Udaletxean dago ostatua, eta goian haurtzaindegia dago: bertara zihoan emakume batek ikusi du barrotea moztuta eta leihoa irekita. Ondorioz, Ertzaintzara deitu du, eta langileei ondoren. "10:30ean irekitzen dugu taberna, eta ordurako Ertzaintzak bazekien. Hemen egon dira haien probak egiten eta aztarnaren bat bilatzen. Esan dutenez, eskularruak jantzita zituzten lapurreta egiteko garaian: hauek badakite lapurretan ibiltzen".
Duela urte bat telebista bat eraman zuten lapurreta egin zutenean, eta galera handiagoa izan zen. Duela 20 bat egun Alegia inguruan ibili ziren lapurretak egiten eta "esperoan geunden, egun batean edo bestean etorriko zirela bagenekien, baina zer egin behar genuen, taberna ez itxi? Ezin da ezer egin".
Tolosako Ertzaintzan jarri dute salaketa. Ostatua Udaletxearena da, eta beraiei dagokie barrotea aldatzea, edo leiho berria jartzea.