Tolosaldeko Hitza

Jexuxmari Ormaetxea izan da garaile bigarren saioan

Orendain Gipuzkoako Sega Txapelketako bigarren kanporaketa jokatu zen igandean; honen ostean, 'Urki' da nagusi.

erredakzioA

Jexuxmari Ormaetxea Urkik irabazi du Gipuzkoako Sega Txapelketako bigarren jardunaldia. Pasa den igandean, Orendainen jokatu zen norgehiagokan eskualdeko bost segalari lehiatu ziren. Belar berde eta astun samarra izan zuten lehiakideek, eta euririk gabe jokatu zen saioa. Oso giro aproposa egin zuen segarako.

Bertako segalariak 178 kiloko aldea kendu zion Arkaitz Arteaga bigarren sailkatu gazteari. Bestalde, 228,5 kiloko diferentzia atera zion Andoni Goikoetxeari eta 293koa Mikel Aranalderi. Azkena sailkatzen Garikoitz Etxeberria izan zen. Aipatutako kilo horien baitan daude ere segalari bakoitzari ezarri zitzaizkion penalizazioetako kiloak. Horri dagokionean, aipagarria izan da Arteaga segalaria, ez baitzuen penalizaziorik jaso, eta, gainera, igandekoan bigarren sailkatu zen.

Orendaingo bigarren jardunaldia, kiloetara jokatu zen eta lehian ziharduten bost segalariek ordu erdiko lana egin zuten. Urkik eta Goikoetxeak bosgarren sailari ekinda agortu zuten denbora. Lehen saila batera ebaki zuten Ormaetxeak, Goikoetxeak eta Etxeberriak. Minutu erdira Aranaldek eta minutu eta 16 segundora Arteagak. Bigarren saila, berriz, Orendaingoak ebaki zuen azkarren, eta minutu eta 27 segundora Goikoetxeak. Hirugarren saila ere Urkik ebaki zuen azkarren (19:20), eta bigarren Goikoetxeak (20:14). Laugarren saila ebakita, Urkik minutu bateko aldea kendu dio Goikoetxeari.

Hirugarren jardunaldia igande honetan jokatuko da, Errezilgo Etumetan, 18:00etatik aurrera.

############

GIPUZKOAKO SEGA TXAPELKETA

Bigarren jardunaldia

Jexuxmari Ormaetxea Urki (Orendain). 2.105,5 kilo (penalizazio bat jaso zuen; +20 kilo). 10 puntu.

Arkaitz Arteagaa (Baliarrain). 1.927,5 kilo (penalizaziorik ez zuen jaso). 8 puntu.

Andoni Goikoetxea (Gaztelu). 1.877 kilo (penalizazio bat jaso zuen; +20 kilo). 6 puntu.

Mikel Aranalde (Gaztelu). 1.812,5 kilo (bi penalizazio jaso zituen; +40 kilo). 4 puntu.

Garikoitz Etxeberria (Amasa). 1.684,5 kilo (bi penalizazio jaso zituen; +40 kilo). 2 puntu.

Sailkapen orokorra

Jexuxmari Ormaetxea Urki (Orendain). 13 puntu.

Andoni Goikoetxea (Gaztelu). 11 puntu.

Arkaitz Arteaga (Baliarrain). 9 puntu.

Mikel Aranalde (Gaztelu). 8 puntu.

Garikoitz Etxeberria (Amasa). 4 puntu.

############